अर्थ विभागापुरतीच तदर्थ पदोन्नती का? जि.प. कर्मचारी महासंघाचा सीईओंकडे इशारा
सोलापूर : जिल्हा परिषदेत अर्थ विभागातील कर्मचाऱ्यांना तदर्थ पदोन्नती दिल्या जात असताना इतर विभागांतील पात्र कर्मचाऱ्यांनाही त्याच धर्तीवर पदोन्नती देण्यात याव्यात, अशी मागणी जिल्हा परिषद कर्मचारी महासंघाने मुख्य कार्यकारी अधिकाऱ्यांकडे केली आहे. या संदर्भात महासंघाच्या पदाधिकाऱ्यांनी निवेदन सादर करून प्रशासनाचे लक्ष वेधले.
महासंघाच्या म्हणण्यानुसार, अर्थ विभागात लिपिक संवर्गातील कनिष्ठ सहाय्यक, वरिष्ठ सहाय्यक तसेच प्रशासकीय अधिकाऱ्यांची तदर्थ नियुक्ती केली जाते. त्याचप्रमाणे ग्रामसेवक, आरोग्यसेवक, पर्यवेक्षक, पशुधन पर्यवेक्षक, प्रसार पर्यवेक्षक आदी पदांनाही तात्पुरत्या स्वरूपात तदर्थ पदोन्नतीची संधी द्यावी, अशी मागणी करण्यात आली आहे.
दरम्यान, दिव्यांग कर्मचारी संघटनेचे जिल्हा सचिव लक्ष्मण वंजारी यांनी जिल्हा परिषदेत बोगस दिव्यांग प्रमाणपत्रांच्या चौकशीचीही मागणी केली.
या वेळी महासंघाचे जिल्हाध्यक्ष राजेंद्र देशपांडे, विभागीय सचिव दिनेश बनसोडे, कार्याध्यक्ष सचिन मायनाळ, सहसचिव सुरेश राठोड, लक्ष्मण वंजारी, प्रमोद धनवडे आदी उपस्थित होते.