शिवसेनेत नवी जबाबदाऱ्या; धैर्यशील माने सोलापूर, तर ज्योती वाघमारे शिर्डी लोकसभा संपर्कप्रमुख
सोलापूर : शिवसेनेच्या संघटनात्मक बांधणीला बळकटी देण्यासाठी महत्त्वाच्या पातळीवर नियुक्त्या जाहीर करण्यात आल्या असून सोलापूर लोकसभा संपर्कप्रमुखपदी खासदार धैर्यशील माने यांची निवड करण्यात आली आहे. तर शिर्डी लोकसभा संपर्कप्रमुखपदी खासदार ज्योती वाघमारे यांची नियुक्ती करण्यात आली आहे.
शिवसेनेचे मुख्य नेते व राज्याचे उपमुख्यमंत्री एकनाथ शिंदे यांच्या आदेशानुसार या नियुक्त्या करण्यात आल्या असून पक्षाच्या लोकसभा स्तरावरील संपर्क व समन्वय अधिक मजबूत करण्याचा उद्देश यामागे असल्याचे सांगितले जाते.
नियुक्तीनंतर खासदार ज्योती वाघमारे यांनी पक्ष नेतृत्वाचे आभार मानत ही जबाबदारी समर्थपणे पार पाडण्याचा विश्वास व्यक्त केला. तसेच इतर नव्याने नियुक्त झालेल्या संपर्कप्रमुखांचे त्यांनी अभिनंदन करून त्यांना शुभेच्छा दिल्या.
यावेळी त्यांनी आपल्या भावना व्यक्त करताना सांगितले की, “वंदनीय हिंदुहृदयसम्राट शिवसेनाप्रमुख बाळासाहेब ठाकरे व धर्मवीर आनंद दिघे यांच्या आशीर्वादाने, तसेच मुख्य नेते एकनाथजी शिंदे यांच्या मार्गदर्शनाखाली मिळालेली ही जबाबदारी निश्चितच पक्षवृद्धीसाठी उपयोगात आणणार आहे.”
या नियुक्त्यांमुळे आगामी लोकसभा निवडणुकांच्या पार्श्वभूमीवर शिवसेनेची संघटनात्मक पकड अधिक मजबूत होणार असल्याची राजकीय वर्तुळात चर्चा आहे.