सोलापुरात लघुपटांची मेजवानी; ‘अस्तित्व मेकर्स’चा महोत्सव रसिकांच्या मनात घर करून गेला.
सोलापूर, दि. ३ एप्रिल २०२६ : सोलापुरातील सांस्कृतिक विश्वाला नवसंजीवनी देणारा अस्तित्व मेकर्स फाउंडेशन आयोजित लघुपट चित्रपट महोत्सव मोठ्या उत्साहात पार पडला. डॉ. निर्मलकुमार फडकुले सभागृहात रंगलेल्या या महोत्सवाने रसिकांना दर्जेदार लघुपटांची मेजवानी दिली.
महोत्सवाचे उद्घाटन प्रिसिजन फाउंडेशनच्या अध्यक्षा डॉ. सुहासिनी शहा यांच्या हस्ते झाले. यावेळी बोलताना त्यांनी “अस्तित्व मेकर्स फाउंडेशनचे कार्य सोलापुराच्या सांस्कृतिक क्षेत्रासाठी अत्यंत प्रेरणादायी आहे. या महोत्सवामुळे स्थानिक रसिकांना उत्कृष्ट लघुपटांचा आस्वाद घेण्याची संधी मिळते,” असे गौरवोद्गार काढले.
यंदाच्या महोत्सवात ‘नटराजा’ (सिंधुदुर्ग) आणि ‘फ्रेम्स’ (मुंबई) या लघुपटांनी प्रेक्षकांची विशेष दाद मिळवली. भावनिक, सामाजिक आणि वास्तववादी विषय हाताळणाऱ्या या चित्रपटांनी रसिकांना खिळवून ठेवले, अशी माहिती संस्थेचे अध्यक्ष प्रा. किरण लोंढे यांनी दिली.
६० लघुपटांतून ७ उत्कृष्टांची निवड
महोत्सवाच्या आठव्या वर्षात सुमारे ६० लघुपट ऑनलाइन पद्धतीने सहभागी झाले होते. त्यातून पुण्याचे दिग्दर्शक योगेश भिसे आणि फिल्म एडिटर सचिन जगताप यांनी परीक्षक म्हणून खालील ७ उत्कृष्ट लघुपटांची निवड केली—
नटराजा – सिंधुदुर्ग
फ्रेम्स – मुंबई
कूस – पुणे
सुलतान – सातारा
त्या भेटीनंतर – मुंबई
साठीतला शम्मी – मुंबई
अंदर की बात – मुंबई
या सर्व निवडक लघुपटांचे प्रदर्शन महोत्सवात करण्यात आले.
मान्यवरांची उपस्थिती, कलाकारांचा सन्मान
या सोहळ्यास दत्ताजी गायकवाड, श्रद्धा जवंजाळ, शशिकांत पाटील, डॉ. राजीव दबडे, डॉ. अतुल वेलणकर, विजयकुमार साळुंखे, संजय सावंत यांसह अनेक मान्यवर उपस्थित होते.
महोत्सवात सहभागी झालेल्या दिग्दर्शक व कलाकारांचा यावेळी सन्मान करण्यात आला.
सलग आठव्या वर्षी यशस्वी आयोजन
महोत्सवाचे हे सलग आठवे वर्ष असून, महाराष्ट्रभरातील नवोदित आणि अनुभवी दिग्दर्शकांना एक व्यासपीठ उपलब्ध करून देण्यात अस्तित्व मेकर्स फाउंडेशनने सातत्य राखले आहे.
या यशस्वी आयोजनासाठी किरण लोंढे, सचिन जगताप, आनंद भालेराव, केतकी रानडे, ओंकार साठे, सोमनाथ लोखंडे, तिपय्या हिरेमठ, सागर देवकुळे, बाळवंत जोशी, अश्विनी मेटकरी व इतर पदाधिकाऱ्यांनी विशेष परिश्रम घेतले.
एकूणच, या लघुपट महोत्सवाने सोलापुरातील सांस्कृतिक चळवळीला नवी ऊर्जा देत, नव्या कलावंतांना प्रोत्साहन देण्याचे काम पुन्हा एकदा यशस्वीपणे पार पाडले.